Það kemur kannski einhverjum á óvart en varnarmaðurinn Antonio Rudiger hóf ferilinn sem vængmaður hjá liði Hertha Zehlendorf í Þýskalandi.
Rudiger greinir sjálfur frá þessu en hann lék í sókninni þar ásamt John Brooks sem er varnarmaður bandaríska landsliðsins í dag.
Rudiger er ekki beint þekktur fyrir að vera góður á boltanum en er ansi röskur og hefur það hjálpað honum í byrjun ferilsins.
„Ég lék með Hertha Zehlendorf og þar spilaði ég sem sóknarmaður ásamt John Brooks sem er í dag varnarmaður Wolfsburg," sagði Rudiger.
„Við skipuðum þriggja manna sóknarlínu, John fyrir miðju, ég var vinstra megin og Jerome Kiesewetter var hægra megin. Hann spilar í dag fyrir Inter Miami á hægri vængnum."
„Ég og Jerome vorum ansi fljótir og John var tæknilega góður og stór. Hann skallaði flest allt í netið."
Athugasemdir