„Mjög líklega," sagði Freyr Alexandersson, aðstoðarþjálfari, í Innkastinu eftir leikinn á laugardag aðspurður hvort að breytingar verði á byrjunarliðinu gegn Albaníu.

„Við þurfum að vera þéttari á ákveðnum svæðum á vellinum og það er sú breyting sem verður taktískt. Síðan þurfum við að sjá heilsuna og hvernig strákarnir pússlast inn í það."

„Við þurfum að vera þéttari en við megum alls ekki vera of passífir. VIð þurfum að finna jafnvægi í því."

Ísland vann Albaníu 1-0 í hörkuleik á Laugardalsvelli í júní og Freyr reiknar með hörkuleik annað kvöld.

„Þetta verður algjört stríð og ótrúlega skemmtilegur leikur til að takast á við. Það eru ótrúlega dýrmæt stig undir. Við getum skilið þá eftir. Það væri rosalega sætt að fara til Albaníu og ná í þrjú stig fyrir október gluggann. Við vitum að þetta verður erfitt en við erum brattir og með mikið sjálfstraust núna," sagði Freyr.