Reece James missir af næstu leikjum Englands í Þjóðadeildinni gegn Belgíu og Íslandi. Það kemur því á óvart að hann hafi verið valinn í landsliðshóp Gareth Southgate sem var kynntur í gær.
James fékk að líta rauða spjaldið fyrir kjaftbrúk við dómarann eftir tap Englands gegn Danmörku á Wembley fyrr í haust. Dómarinn var búinn að flauta leikinn af þegar hann ákvað að sýna James rauða spjaldið og hefur bakvörðurinn verið dæmdur í tveggja leikja bann í kjölfarið.
James mun því spila æfingaleik Englands gegn Írlandi sem fer fram á Wembley næsta fimmtudag og leyfa hinum bakvörðunum að berjast um stöðuna í Þjóðadeildinni. Southgate vantar ekki hægri bakverði en Trent Alexander-Arnold, Kyle Walker, Kieran Trippier, Ainsley Maitland-Niles og Joe Gomez eru allir í leikmannahópinum.
Ekkert pláss er fyrir Aaron Wan-Bissaka í hópinum.
Athugasemdir
