Fótbolti.net

lau 07. febrúar 2026 23:20

Ívan Guðjón Baldursson

Howe: Augljóslega ekki að gera nógu góða hluti

Mynd: EPA

Newcastle United tapaði á heimavelli gegn Brentford í ensku úrvalsdeildinni í dag og viðurkenndi Eddie Howe eftir leikslok að hann væri ekki að standa sig nægilega vel í starfinu sem aðalþjálfari liðsins.

Brentford hafði betur eftir æsispennandi fimm marka leik og skilur Newcastle eftir í neðri hluta deildarinnar, með 33 stig eftir 25 umferðir. Liðið er búið að tapa fjórum og gera eitt jafntefli í síðustu fimm leikjum í öllum keppnum.

Fjölmiðlar á Englandi telja starf Howe vera í hættu eftir slakt gengi.

„Það er alltaf pressa á manni í þessu starfi og það breytir engu fyrir mig hvers konar pressa það er, hvort sem hún snýst um að vinna næsta leik eða að snúa slæmu gengi við eins og er tilfellið með okkur á þessum tímapunkti," sagði Howe eftir leikinn dramatíska þar sem Newcastle náði forystunni en endaði á að tapa á St. James' Park.

„Ég er mjög kröfuharður á sjálfan mig og miðað við gengið á tímabilinu þá er ég augljóslega ekki að gera nægilega góða hluti við stjórnvölinn sem stendur. Ég er pirraður og reiður út í sjálfan mig og ég kenni sjálfum mér um. Ég tek þessa ábyrgð á mínar herðar, ég kenni engum öðrum um.

„Ég veit að ég legg mig allan fram í starfið en ég þarf að vinna betur og gera meira. Ég þarf að finna nýjar leiðir til að ná því besta úr leikmönnum. Ég held ekki að margir leikmenn í hópnum myndu segja að þeir væru að spila sinn besta fótbolta þessa dagana, sem þýðir að við höfum svigrúm til að bæta okkar leik umtalsvert."

Stuðningsmenn Newcastle bauluðu á leikmenn eftir tapið í dag enda eru þeir orðnir þreyttir á slöku gengi.

„Stuðningsmennirnir munu standa með okkur um leið og við leggjum inn nægilega góða frammistöðu. Ég veit að þeir munu standa með okkur, þeir hafa alltaf verið frábærir. Þeirra viðbrögð í dag eru eðlileg. Þeir eru að bregðast við því sem við erum að sýna þeim, mér finnst það ekki vera neitt vandamál. Það er undir okkur komið að snúa því við með góðri frammistöðu."

Newcastle er svo gott sem búið að missa af meistaradeildarsæti fyrir næstu leiktíð en liðið mætir Qarabag í fyrstu umferð í útsláttarkeppni Meistaradeildarinnar í seinni hluta mánaðar.

Lærlingar Eddie Howe duttu úr leik í undanúrslitum deildabikarsins og heimsækja Aston Villa í FA bikarnum um næstu helgi.

		L	U	J	T	ms:	mf:	mun	Stig
1	Arsenal	28	18	7	3	56	21	+35	61
2	Man City	27	17	5	5	56	25	+31	56
3	Aston Villa	28	15	6	7	38	30	+8	51
4	Man Utd	27	13	9	5	48	37	+11	48
5	Chelsea	27	12	9	6	48	31	+17	45
6	Liverpool	27	13	6	8	42	35	+7	45
7	Brentford	27	12	4	11	40	37	+3	40
8	Bournemouth	27	9	11	7	43	45	-2	38
9	Everton	27	10	7	10	29	31	-2	37
10	Fulham	27	11	4	12	38	41	-3	37
11	Newcastle	27	10	6	11	38	39	-1	36
12	Sunderland	27	9	9	9	28	33	-5	36
13	Crystal Palace	27	9	8	10	29	32	-3	35
14	Brighton	27	8	10	9	36	34	+2	34
15	Leeds	27	7	10	10	37	46	-9	31
16	Tottenham	27	7	8	12	37	41	-4	29
17	Nott. Forest	27	7	6	14	25	39	-14	27
18	West Ham	27	6	7	14	32	49	-17	25
19	Burnley	27	4	7	16	29	52	-23	19
20	Wolves	29	2	7	20	20	51	-31	13