Íslendingalið Venezia féll úr Serie A í vor og er að undirbúa sig fyrir lífið í Serie B.
Bjarki Steinn Bjarkason og Óttar Magnús Karlsson eru leikmenn félagsins úti á láni og þá var Arnór Sigurðsson að klára lánssamninginn við Venezia frá CSKA Moskvu.
Feneyingar vilja bæta Íslendingum við sínar raðir og hafa þeir augastað á Hákoni Arnari Haraldssyni sem hefur verið að gera góða hluti með FC Kaupmannahöfn og er búinn að stíga sín fyrstu skref með A-landsliðinu.
Venezia er að ráða Ivan Javorcic til starfa sem þjálfara og ætlar að bæta leikmönnum við hópinn til að gefa honum fleiri valmöguleika.
Fjölmiðlar í Feneyjum hafa rætt mörg nöfn en nafn Hákons Arnars heyrist mest af öllum.
Þeir tala um Hákon sem fjölhæfan, tæknilegan og kröftugan leikmann sem getur leikið á miðjunni, í holunni fyrir aftan fremsta mann og á báðum köntum ef þess þarf.
Hákon Arnar er 19 ára gamall og lék mikilvægt hlutverk á lokaspretti danska úrvalsdeildartímabilsins ásamt æskuvini sínum Ísaki Bergmanni Jóhannessyni.
Hákon og Ísak áttu stóran þátt í sigrum FCK sem tryggðu Danmerkurmeistaratitilinn á lokaspretti tímabilsins.
