Ísland spilar í nýjum búningum í Rússlandi.
Ísland leikur í nýjum búningum á HM í Rússlandi næsta sumar. Þetta staðfesti Klara Bjartmarz, framkvæmdastjóri KSÍ, í samtali við Fótbolta.net í dag.
Nýir búningar voru hannaðir fyrir landsliðið fyrir EM í Frakklandi í fyrra. KSÍ er með áframhaldandi samning við Errea og byrjað er að funda um nýja búninga.
„Við erum nýlega búin að funda með Erra varðandi framhaldið á þessu," sagði Klara við Fótbolta.net í dag.
Skiptar skoðanir voru á búningunum þegar þeir komu út fyrir EM í fyrra en búningarnir virtust á endanum falla nokkuð vel í kramið hjá landsmönnum.
„Við erum með það í ferli hvaða leiðir við ætlum að fara í nýja hönnun og nýtt útlit þannig að allir verði sáttir og ánægðir, hvernig sem það á að gerast," sgaði Klara og hló.
Klara bætti einnig við að ekki sé einungis um að ræða nýja búninga heldur allan fatnað sem tengist landsliðinu.
Athugasemdir
