England: Úlfarnir komu til baka og sigruðu í Southampton

Southampton tók á móti Wolves í fyrsta leik dagsins í ensku úrvalsdeildinni og úr varð mikill baráttuleikur milli tveggja sterkra liða.

Danny Ings gerði eina mark fyrri hálfleiksins með frábærri afgreiðslu eftir laglega fyrirgjöf frá Stuart Armstrong.

Úlfarnir mættu grimmir til leiks í síðari hálfleiks og voru búnir að jafna eftir tæpar átta mínútur. Ruben Neves skoraði þá úr vítaspyrnu eftir að dæmd hafði verið hendi á Ryan Bertrand.

Gestirnir voru sterkari aðilinn stærstan hluta síðari hálfleiks og skoraði Pedro Neto glæsilegt mark á 66. mínútu. Hápressa Úlfanna skilaði sér með varnarmistökum hjá heimamönnum. Boltinn endaði hjá Neto sem gerði frábærlega að leika á varnarmann og skora úr þröngu færi.

Southampton átti erfitt með að brjóta skipulagt lið Úlfanna á bak aftur og lokatölur urðu 1-2. Úlfarnir eru komnir í tólfta sæti, með 30 stig. Þetta var sjötta tap Southampton í röð í deildinni og er liðið með 29 stig.

Liðin mættust í enska bikarnum í vikunni og vann Southampton þá sannfærandi sigur á Molineux, 0-2.