Viktor Bjarki Daðason byrjaði við hlið Mohamed Elyounoussi í fremstu víglínu hjá FC Kaupmannahöfn sem tók á móti Nordsjælland í efstu deild í Danmörku. Rúnar Alex Rúnarsson sat á bekknum.

FCK leiddi eftir fyrri hálfleikinn og var Viktori Bjarka skipt af velli á 61. mínútu, en níu mínútum síðar fékk samherji hans að líta seinna gula spjaldið sitt.

Tíu heimamenn réðu ekki við Nordsjælland og enduðu á að missa forystuna niður í tap, svo lokatölur urðu 1-2. Þetta er fjórði tapleikurinn í röð hjá FCK í deildinni og er liðið í sjötta sæti með 28 stig eftir 20 umferðir, tveimur stigum á eftir Nordsjælland sem er á góðri siglingu með þrjá sigra í röð.

Hörður Björgvin Magnússon átti þá góðan leik þegar Levadiakos hélt hreinu gegn stórveldi Olympiakos í toppbaráttu gríska boltans.

Levadiakos náði að knýja fram markalaust jafntefli og eru Hörður og félagar í fjórða sæti með 39 stig eftir 21 umferð, átta stigum á eftir Olympiakos sem er í titilbaráttu.

Á sama tíma var Hjörtur Hermannsson í byrjunarliði Volos sem gerði jafntefli við Aris. Volos og Aris eru um miðja deild í harðri baráttu um sæti í Sambandsdeild Evrópu fyrir næstu leiktíð.

Í efstu deild í Hollandi sat Brynjólfur Andersen Willumsson allan tímann á bekknum í tapi hjá Groningen gegn Utrecht. Þetta var fjórði tapleikurinn í röð hjá Groningen sem er búið að dragast afturúr í baráttunni um evrópusæti og gæti misst það til Utrecht.

Sigurður Bjartur Hallsson lék allan leikinn í fremstu víglínu hjá AD Merida í þriðju efstu deild á Spáni en tókst ekki að skora í 3-1 tapi.

Merida tapaði gegn fallbaráttuliði Ourense og er þetta skellur fyrir Sigurð og félaga sem eru að reyna að komast upp í næstefstu deild.

Í B-deildinni á Ítalíu rúllaði Venezia yfir Cesena í toppbaráttunni en Bjarki Steinn Bjarkason var ekki í hóp.

Feneyingar eru með fjögurra stiga forystu á toppi Serie B og stefna upp um deild. Frosinone er í öðru sæti með leik til góða og fylgja Palermo og Monza einnig fast á eftir.

Að lokum var Bergrós Ásgeirsdóttir í byrjunarliði Aarau sem steinlá gegn Servette í svissnesku deildinni. Aarau er á botni deildarinnar með 3 stig eftir 13 umferðir.

Kaupmannahöfn 1 - 2 Nordsjælland

Levadiakos 0 - 0 Olympiakos

Volos 1 - 1 Aris

Groningen 1 - 2 Utrecht

Ourense 3 - 1 Merida

Cesena 0 - 4 Venezia

Göteborg 4 - 2 Stabæk

Kortrijk 1 - 0 Beerschot

Aarau 0 - 3 Servette

Vittsjö 1 - 1 Rosengard