Evrópska fótboltasambandið UEFA ætlar að yfirfæra nýja dómarareglu yfir á félagsliðakeppnir fyrir næstu leiktíð, þar sem einungis fyrirliðar mega ræða við dómara á meðan á leik stendur. Ef aðrir leikmenn gera tilraun til þess, fá þeir gult spjald að launum.
UEFA telur þessa reglubreytingu hafa bætt Evrópumótið og má búast við að sjá hana í öllum keppnum á vegum UEFA, svo sem Meistaradeildinni, Evrópudeildinni og Sambandsdeildinni.
Það fóru mörg gul spjöld á loft í riðlakeppni Evrópumótsins í ár og voru mörg þeirra gefin til leikmanna sem töluðu við dómara án leyfis.
„Þessi reglubreyting hjálpar ímynd fótboltans á heimsvísu og eykur mikilvægi þess að sýna virðingu í garð dómara," segir talsmaður UEFA meðal annars.
„Reglubreytingin mun taka gildi í öllum keppnum UEFA frá og með næstu viku."
Ef fyrirliði liðs er markvörður þá verður að velja einn útispilandi leikmann til að tala við dómarann á meðan á leik stendur. Þegar það er gert má markvörðurinn ekki ræða við dómarann þrátt fyrir að vera fyrirliði, en Gianluigi Donnarumma fyrirliði Ítalíu klikkaði á þessu gegn Spáni í riðlakeppni EM.
Athugasemdir
