Nígeríski framherjinn Victor Osimhen vill ekki vera áfram hjá Napoli í ítalska boltanum, en hann er eftirsóttur af ýmsum stórliðum. Í sumar er það forgangsmál hjá honum að skipta um félag, samkvæmt heimildum Fabrizio Romano.
Napoli er þó ekki reiðubúið til að selja stórstjörnuna sína með neinum afslætti og vill ítalska félagið fá 130 milljónir evra fyrir leikmanninn, sem á ekki nema tvö ár eftir af samningi.
Chelsea og fleiri félög voru einnig áhugasöm um Osimhen en verðmiðinn fældi þau í burtu. Það sama virðist vera að gerast hjá PSG, sem virðist ekki reiðubúið til að greiða svo háan verðmiða, en sádi-arabísk félög fylgjast spennt með þróun mála.
Osimhen er gríðarlega eftirsóttur í Sádi-Arabíu og gæti verið opinn fyrir félagsskiptum þangað ef hann fær nógu gott samningstilboð.
Antonio Conte, þjálfari Napoli, vill fá Romelu Lukaku inn til að fylla í skarðið fyrir Osimhen.
Athugasemdir
