Emile Smith Rowe kom ekki við sögu
Emile Smith Rowe leikmaður Arsenal hefur verið sterklega orðaður við Fulham og athygli vakti að hann kom ekki við sögu í leiknum. Mikel Arteta sagði að það væru hlutir í gangi bak við tjöldin og þjálfarateymið hafi talið best að leikmaðurinn myndi ekki taka þátt í leiknum.

Lið Arsenal var skipað blöndu af reynslumiklum leikmönnum og ungum og efnilegum strákum. Meðal leikmanna sem fengu að spreyta sig voru Ethan Nwaneri og Ayden Heaven sem báðir eru sautján ára.

Arsenal mun næst leika gegn Manchester United, á SoFi leikvangnum í Los Angeles á laugardag.

Sérhönnuð treyja Bournemouth
Dominic Solanke skapaði talsverðan usla í leiknum gegn Arsenal en hann og samherjar hans í Bournemouth léku í nýjum treyjum félagsins sem Michael B Jordan hannaði.

Michael B. Jordan er hæfileikaríkur leikari og kvikmyndaframleiðandi en hann er hluthafi í Bournemouth.

Enginn auglýsandi er framan á treyjunni en félagið hafði samið við asíska veðmálafyrirtækið BJ88 um að vera framan á treyjunum. Nýjar reglur ensku úrvalsdeildarinnar banna hinsvegar veðmálaauglýsingar sem aðalstyrktaraðila á treyjunum.