Þýskalandsmeistarar Bayer Leverkusen eru að ganga frá samkomulagi við Aston Villa um að fá Emiliano Buendía á lánssamningi út tímabilið með kaupmöguleika sem hljóðar upp á 20 milljónir evra.
Þetta þýðir að þeir munu hætta við að fá James McAtee frá Englandsmeisturum Manchester City, eins og greint var frá fyrr í dag.
Sky í Þýskalandi greinir frá þessum fregnum. Þar segir að viðræður Leverkusen við Aston Villa og Buendía séu á lokametrunum.
Buendía er 28 ára gamall sóknartengiliður með eitt og hálft ár eftir af samningi hjá Aston Villa, þar sem hann er ekki með sæti í byrjunarliðinu undir stjórn Unai Emery.
Leverkusen er í leit að leikmanni til að fylla í skarðið fyrir Martin Terrier sem er frá út tímabilið.
Buendía hefur samþykkt að framlengja samning sinn við Aston Villa um eitt ár til að komast út á lánssamningi. Nýr samningur hans gildir því í tvö og hálft ár, eða út júní 2027.
Buendía á einn A-landsleik að baki fyrir Argentínu og var lykilmaður í liði Norwich City áður en hann var fenginn yfir til Aston Villa sumarið 2021. Villa borgaði um 35 milljónir fyrir leikmanninn sem var metfé fyrir félagið tíma.
Buendía er enn í dag dýrasti leikmaður sem Norwich hefur selt, á undan Ben Godfrey og James Maddison.
Athugasemdir
