„Það verður auðveldara fyrir mig að fylgjast með strákunum sem spila í Evrópu í dag, ég er miðsvæðis og það er auðvelt að ferðast um hvort sem það er til Hollands, Skandinavíu eða Englands. Eiður er svo mikið hér heima núorðið," sagði Arnar Þór við Fótbolta.net í dag en honum til aðstoðar verður Eiður Smári Guðjohnsen.

„Þar sem fyrsti leikur í undankeppninni verður ekki fyrr en í september fara næstu mánuðir í að setja upp gagnabanka. Við þekkjum marga af þessum leikmönnum en þar sem ég er að koma að utan inn í þetta vil ég gjarnan sjá sem flesta stráka. Ætlunin er að allir eigi möguleika til koma sér í liðið."

Arnar Þór sagði möguleika á að fá æfingaleiki í mars eða júní þar sem hann gæti byrjað að skoða leikenn.

„Það væri sérstaklega þá í júní þar sem við getum verið lengur saman, í 9-10 daga. Það væri mjög mikilvægt að fá æfingaleiki þá."

Arnar Þór sagði að hann hafi ekki verið á leiðinni heim en tók að sér að leikgreina landslið Belgíu fyrir leik við A-landsliðið og hafi í kjölfarið farið að ræða við Guðna Bergsson formann KSÍ.

„Við Guðni höfum verið í sambandi með starfið fyrir U21 árs landsliðið en líka það sem væri hægt að gera fyrir íslenska knattspyrnu almennt. Guðni hefur verið að tala um yfirmann knattspyrnumála og hvernig það starf gæti litið út," sagði Arnar en kemur hann til greina í það starf líka?

„Já, ég gæti komið til greina þar ef þess verður óskað. Ég hef mikinn áhuga á öllu slíku. Hjá Lokeren hef ég verið þjálfari varaliðsins og verið í að endurskipuleggja allt starf yngri flokka hjá félaginu. Það er rosalega margt sem er hægt að gera fyrir íslenska knattspyrnu og ég hef skoðað það undanfarna mánuði og hvernig það starf gæti litið út."

Nánar er rætt við Arnar Þór í sjónvarpinu hér að ofan.