Heimild: Heimasíða Stríðsmanna | MBL
Nýtt íslenskt knattspyrnufélag ætlar sér að hefja þátttöku í 4. deildinni næsta sumar. Félagið átti að bera heitið Stríðsmenn en Íþróttasamband Íslands, ÍSÍ, hefur hafnað því nafni. Nafn tengt stríði samræmist ekki gildum sambandsins.
Því hefur nafni félagsins verið breytt í Knattspyrnufélagið Skandinavía. Það hefur æfingaraðstöðu hjá FH og verður með reynsluæfingar á næsta ári fyrir leikmenn sem vilja spreyta sig með félaginu. Reynsluæfingarnar verða morgunæfingar frá klukkan 09:00 til 11:30. Æfingadagarnir eru 13.-17. janúar, 24.-28. febrúar og 23.-27. mars.
Saint Paul Edeh er talsmaður og þjálfari liðsins, sem hefur vakið athygli fyrir auglýsingaherferð á ruslatunnum í Skotlandi.
Saint Paul starfar sem umboðsmaður fyrir knattspyrnumenn og telur að færir knattspyrnumenn geti komið erlendis frá og gert góða hluti í neðri deildum íslenska boltans.
Á heimasíðu félagsins kemur fram að auglýst hafi verið eftir leikmönnum víðsvegar um Evrópu, eða í Búlgaríu, Rúmeníu, Póllandi, Króatíu, Frakklandi, Svíþjóð, Portúgal, Spáni, Bretlandi og Belgíu.
Athugasemdir