Cecilía Rán hélt hreinu og vann í Íslendingaslag
Inter vann þægilegan 3-0 sigur á Fiorentina í Íslendingaslag í Seríu A í ítalska kvennaboltanum í dag.
Cecilía Rán Rúnarsdóttir stóð á milli stanganna hjá Inter og hélt hreinu laki.
Karólína Lea Vilhjálmsdóttir kom inn af bekknum hjá Inter í þeim síðari.
Katla Tryggvadóttir byrjaði hjá Fiorentina en Hlín Eiríksdóttir kom inn á fyrir hana þegar hálftími var eftir. Íris Ómarsdóttir byrjaði einnig hjá Flórensarliðinu.
Inter er í öðru sæti deildarinnar með 27 stig en Fiorentina í 7. sæti með 18 stig.
Hildur Antonsdóttir var í byrjunarliði Madrid CFF sem tapaði fyrir Deportivo La Coruna, 6-1, í Liga F á Spáni.
Madrídarliðið hefur átt ágætis tímabil en þetta tap kom sérstaklega á óvart þar sem Deportivo er sex stigum á eftir Madrid þegar nítján umferðir hafa verið leiknar. Madrid er í 10. sæti með 26 stig, en Deportivo í 11. sæti með 20 stig.
Ásdís Karen Halldórsdóttir byrjaði hjá Braga sem gerði markalaust jafntefli við Valadares Gaia í portúgölsku deildinni. Braga er í 6. sæti með 13 stig.
Athugasemdir
