Ólafur Kristjánsson látinn fara frá Esbjerg (Staðfest)

Ólafur tók við liðinu síðasta sumar eftir að það féll úr úrvalsdeildinni en stefnan var að fara beint upp. Esbjerg byrjaði af miklum krafti en þegar það leið á tímabilið þá gekk illa að ná í hagstæð úrslit.

Esbjerg tapaði fyrir Fredericia 2-1 í umspilsriiðli dönsku B-deildarinnar í kvöld en úrslitin þýða það að Viborg og Silkeborg fara upp í efstu deild.

Esbjerg hafði aðeins unnið einn af síðustu sex leikjum í deildinni og hafði það mikil áhrif á möguleika þeirra að komast upp.

Danska félagið hefur því ákveðið að slíta samstarfi sínu við Ólaf þegar þrír leikir eru eftir af deildinni.

„Eftir frábæra byrjun á tímabilinu þá verðum við að viðurkenna að uppskeran á stigum eftir vetrarfríið hefur ekki verið ásættanleg og við eigum ekki lengur möguleika á að komast upp í úrvalsdeildina. Á sama tíma höfum við áveðið að fara aðra leið með Esbjerg og kveðjum því Ólaf Kristjánsson. Við óskum honum góðs gengis í framtíðinni og takk fyrir samstarfið," sagði Jimmi Nagel Jacobsen, yfirmaður íþróttamála hjá Esbjerg.

Lars Vind, þjálfari unglingaliðs Esbjerg, mun stýra liðinu í síðustu leikjum mótsins.