Íslenska karlalandsliðið mætir Tyrklandi á Laugardalsvelli annað kvöld klukkan 18:45. Tveir lykilleikmenn eru í banni í þeim leik, þeir Stefán Teitur Þórðarson og Jón Dagur Þorsteinsson.
Sævar Atli Magnússon, leikmaður Lyngby, var kallaður inn í landsliðshópinn eftir 2-2 jafnteflið við Wales á föstudaginn. Margir veltu því fyrir sér afhverju Albert Guðmundsson væri ekki tekinn inn í hópinn en Age Hareide, landsliðsþjálfari Íslands, sat fyrir svörum á fréttamannafundi í dag og var spurður út í Albert.
„Við töluðum við Albert, KSÍ ræddi við Albert um þetta. Það hefur mikið gengið á hjá honum andlega seinustu daga. Þetta er stuttur fyrirvari til að fljúga frá Ítalíu til Íslands. Það væri erfitt fyrir hann, allir setja miklar kröfur á hann.“
Í kjölfarið var Hareide spurður hvort þetta hafi alfarið verið hans ákvörðun um að koma ekki í hópinn á þessum tímapunkti.
„Já þetta var hans ákvörðun. Við leyfðum honum að taka þá ákvörðun, við vildum hann í hópinn en hann þarf vissulega tíma.“ sagði Hareide á blaðamannafundinum í dag.
Stefán Teitur og Jón Dagur eru báðir í banni fyrir uppsafnaðar áminningar en þeir voru báðir í byrjunarliðinu á föstudaginn.
| Lið | L | U | J | T | Mörk | mun | Stig |
|---|---|---|---|---|---|---|---|
| 1. Tyrkland | 3 | 2 | 1 | 0 | 4 - 1 | +3 | 7 |
| 2. Wales | 3 | 1 | 2 | 0 | 4 - 3 | +1 | 5 |
| 3. Ísland | 3 | 1 | 1 | 1 | 5 - 5 | 0 | 4 |
| 4. Svartfjallaland | 3 | 0 | 0 | 3 | 1 - 5 | -4 | 0 |
