Manchester City og Arsenal stigu ekki feilspor í liðinni umferð í ensku úrvalsdeildinni. Lokaumferðin fer fram á sunnudag og spennan er áþreifanleg. Eftir hverja umferð velur Garth Crooks sérfræðingur BBC úrvalslið umferðarinnar.
Markvörður: Ederson (Manchester City) - Þetta hefur ekki verið besta tímabil Brassans en gegn Fulham sýndi hann mikið öryggi og hélt hreinu.
Varnarmaður: Josko Gvardiol (Manchester City) - Króatinn getur ekki hætt að skora! Hefur vaxið hressilega eftir því sem á tímabilið hefur liðið og sjálfstraustið skín af honum.
Varnarmaður: William Saliba (Arsenal) - Það var engin flugeldasýning gegn Man Utd en Arsenal kláraði verkefnið. Franski varnarmaðurinn heldur áfram að vera traustur sem klettur í hjarta varnarinnar.
Varnarmaður: Micky van de Ven (Tottenham) - Hefur átt algjörlega frábært tímabil og skoraði í sigri gegn Burnley um helgina.
Miðjumaður: Tomas Soucek (West Ham) - Hæg byrjun á leiknum gegn Luton en svo fóru Hamrarnir í gang. Soucek var gríðarlega mikilvægur og skoraði.
Miðjumaður: Eberechi Eze (Crystal Palace) - Ernirnir eru á flugi og Eze var magnaður í 3-1 sigri gegn Wolves. Þessi skemmtikraftur skoraði eitt af mörkunum og er að spila frábærlega með Michael Olise.
Miðjumaður: Cole Palmer (Chelsea) - Þvílík sending frá Palmer á Mudryk í fyrsta marki Chelsea í endurkomusigri gegn Nottingham Forest. Palmer heldur áfram að leika við hvurn sinn fingur.
Miðjumaður: Michael Olise (Crystal Palace) - Olise hefur farið með himinskautum með Palace sem hefur farið í gegnum sex leiki án ósigurs. Hann skoraði og lagði upp gegn Úlfunum.
Sóknarmaður: Jhon Duran (Aston Villa) - Skoraði tvívegis í lokin gegn Liverpool og tryggði 3-3 jafntefli. Villa er komið skrefi nær Meistaradeildarsæti.
Sóknarmaður: Phil Foden (Manchester City) - Rosalegt tímabil sem drengurinn hefur átt. Hann skoraði annað mark City í 4-0 sigrinum gegn Fulham. Meistararnir litu aldrei til baka eftir það.
Sóknarmaður: Dominic Calvert-Lewin (Everton) - Lagði upp sigurmark Everton gegn Sheffield United.
Athugasemdir
