Margar af stærstu stjörnum fótboltans eru undir þekktum umboðsmönnum eins og Jorge Mendes, Mino Raiola eða Kia Joorabchian. Harry Kane ákvað hinsvegar að leita til fjölskyldunnar og eldri bróðir hans hefur séð um hans mál.

Charlie Kane er eigandi umboðsskrifstofunnar CK66. Starfstitill sem hljómar vel en sem stendur er viðskiptavinurinn bara einn; Harry Kane.

Á heimasíðu CK66 er sagt að þar starfi sérfræðingar í samningamálum, auglýsingamálum, fjárhagsmálum og lögum, fjölmiðlun og lífsstíl. Heimasíðan er síðan skreytt með myndum af þeirra frægasta og reyndar eina viðskiptavini.

Sem „sérfræðingur" í samningamálum þá gekk Charlie Kane frá því að Harry Kane gerði sex ára samning við Tottenham fyrir þremur árum. Það vakti athygli hversu langur samningurinn var og núna eru enn þrjú ár eftir af honum.

Talað hefur verið um heiðursmannasamkomulag en Daniel Levy stjórnarformaður Tottenham mun ekki selja nema rétta tilboðið kemur frá Manchester City.

Leiðindi hafa skapast, Charlie Kane fær mikla gagnrýni frá stuðningsmönnum Tottenham og staðan tók beygju í sumar þegar Sun greindi frá því að Charlie hefði sagt í brúðkaupi sínu að bróðir sinn myndi fara til City.

Sagt er að Harry hafi núna ráðið nýja almannatengslaskrifstofu til að sjá um sín mál og Charlie verði í „aftursætinu" í komandi viðræðum. Hvort þær fréttir séu réttar á eftir að koma í ljós en orðspor leikmannsins meðal stuðningsmanna Tottenham hefur borið hnekki.

„Ertu að horfa Harry Kane?" var sungið á leikvangi Spurs þegar liðið vann Manchester City í fyrstu umferðinni um síðustu helgi.