Lið vikunnar í enska - Aðeins einn frá Newcastle

Jordan Pickford (Everton) - Enski landsliðsmarkvörðurinn kom Everton oft og mörgum sinnum til bjargar gegn Palace og sá um að landa stigi.

Marc Guehi (Crystal Palace) - Var stórkostlegur gegn Everton og sýndi að hann er ekki bara góður varnarlega. Konfektsendingar fram völlinn og auðvitað var varnarleikurinn ekkert verri.

Timothy Castagne (Leicester City) - Bakvörðurinn skoraði dýrmætt sigurmark liðsins gegn Wolves.

Victor Lindelöf (Manchester United) - Ætlaði að velja Luke Shaw í liðið en hætti við og setti Lindelöf þangað. Ekki nóg með það að hann mætti í undanúrslitaleik og gerði frábærlega heldur skoraði hann vítið sem kom United í úrslitaleikinn. Á skilið að byrja úrslitaleikinn!

Declan Rice (West Ham) - Skoraði stórkostlegt mark gegn Gent í Sambandsdeildinni en gerði svo flottara mark gegn Bournemouth þar sem West Ham gjörsamlega slátraði liðinu. Hvaða lið sem er væri til í að kaupa hann fyrir 80 milljónir punda.

Martin Ödegaard (Arsenal) - Þetta er maðurinn sem Arsenal getur svo sannarlega treyst á í síðustu leikjum tímabilsins. Skoraði annað markið í endurkomunni gegn Southampton og verið gríðarlegur leiðtogi allt tímabilið.

Harry Wilson (Fulham) - Annað sinn í röð sem hann er í liði vikunnar. Gerði fyrra mark Fulham í 2-1 sigrinum á Leeds. Verið gríðarlega mikilvægur í sóknarleiknum.

James Ward-Prowse (Southampton) - Mögnuð frammistaða gegn Arsenal og björgun hans undir lokin enn magnaðri.

Diogo Jota (Liverpool) - Portúgalinn er kominn í gír. Fjögur mörk í síðustu tveimur leikjum. Mikilvægt fyrir Liverpool.

Joelinton (Newcastle United) - Maður leiksins gegn Tottenham og líklega besti leikmaður liðsins á tímabilinu. Eitthvað sem enginn bjóst við fyrir ráðningu Eddie Howe.

Riyad Mahrez (Manchester City) - Þetta segir sig sjálft. Skoraði þrennu í undanúrslitum bikarsins gegn Sheffield United. Annað markið var sérstaklega fallegt þar sem hann hljóp frá miðsvæðinu á meðan Erling Braut Haaland dró varnarmennina að sér.