Lið vikunnar í enska - Bakvörðurinn Rice og Wirtz sýnir hvað hann getur

Markvörður: Senne Lammens (Manchester United) - Hefur farið prýðilega af stað með Manchester United og átti mjög góðan leik í 1-0 sigri gegn Newcastle.

Varnarmaður: Declan Rice (Arsenal) - Leysti stöðu hægri bakvarðar í sigrinum gegn Brighton og gerði það með mikilli prýði.

Varnarmaður: Archie Gray (Tottenham) - Spilaði á miðjunni gegn Palace en til að koma honum í úrvalsliðið er hann látinn í vörnina. Skoraði eina mark leiksins.

Varnarmaður: Kevin Danso (Tottenham) - Hefur alltaf staðið sig vel þegar hann fær traustið hjá Spurs.

Varnarmaður: Lisandro Martínez (Manchester United) - Kominn til baka eftir erfið meiðsli og var með Nick Woltemade í vasanum í sigrinum gegn Newcastle.

Miðjumaður: Ryan Gravenberch (Liverpool) - Ef hann spilar vel þá spilar Liverpool vel. Skoraði í sigrinum gegn Úlfunum.

Miðjumaður: Tijjani Reijnders (Manchester City) - Skoraði í sigri gegn Nottingham Forest. Hafði mikil áhrif á leikinn og sýndi af hverju hann var í svona gríðarlega miklum metum hjá AC Milan.

Miðjumaður: Florian Wirtz (Liverpool) - Farinn að sýna hvað hann getur gert. Gríðarlega hæfileikaríkur leikmaður. Kannski fær hann meira að njóta sín vegna þess að Salah og Isak eru fjarverandi. Þýski landsliðsmaðurinn skoraði í 2-1 sigrinum gegn Wolves.

Miðjumaður: Rayan Cherki (Manchester City) - Einn skemmtilegasti leikmaður heimsfótboltans um þessar mundir. Mark og stoðsending frá honum um helgina.

Miðjumaður: Kevin Schade (Brentford) - Skoraði þrennu og þá fær maður sæti í liðinu. Brentford vann 4-1 gegn Bournemouth.

Sóknarmaður: Ollie Watkins (Aston Villa) - Kom inn af bekknum gegn Chelsea og skoraði bæði mörk Villa í 2-1 útisigri.

Stjórinn: Unai Emery (Aston Villa) - Ellefu sigrar í röð! Sýndi klókindi sín enn og aftur í sigrinum gegn Chelsea þar sem hann útþjálfaði Enzo Maresca.