PSG átti í hættu á að brjóta FFP háttvísisreglur UEFA en náði að bjarga sér fyrir horn með sölu á fimm leikmönnum.

Giovani Lo Celso fór til Real Betis fyrir 22 milljónir, Moussa Diaby til Leverkusen fyrir 15m, Grzegorz Krychowiak til Lokomotiv Moskvu fyrir 12,5m og Timothy Weah til Lille fyrir 10m. Til að ná upphæðinni upp í 60m var Gaitan Robail seldur til Lens á eina milljón.

Lo Celso er verðmætasti leikmaðurinn af þeim sem voru seldir og var að klára frábært tímabil að láni hjá Betis. PSG setti ákvæði í kaupsamninginn, sem segir að Betis þarf að greiða PSG fimmtung af næstu sölu Lo Celso.

Hann er þessa stundina að keppa með Argentínu í Copa America og skoraði í sigri á Venesúela í 8-liða úrslitum.