Spánn: Atletico gerði jafntefli við botnliðið

Leikurinn var nokkuð jafn og leiddu heimamenn í leikhlé eftir óheppilegt sjálfsmark Stefan Savic á 24. mínútu.

Saúl jafnaði í upphafi síðari hálfleiks með geggjuðu skoti rétt utan teigs. Vörn Espanyol náði ekki að hreinsa aukaspyrnu nógu vel frá marki og barst boltinn til Saúl sem er þekktur fyrir góða skottækni.

Meira var ekki skorað í bragðdaufum og taktískum leik en heimamenn í Espanyol áttu ekki minna heldur en stig skilið.

Espanyol er fimm stigum frá öruggu sæti á meðan Atletico situr í fjórða sæti sem stendur.

Espanyol 1 - 1 Atletico Madrid
1-0 Stefan Savic ('24, sjálfsmark)
1-1 Saúl Niguez ('47)

Fyrr í dag átti Athletic Bilbao heimaleik við Villarreal. Heimamenn í Bilbao voru betri og verðskulduðu forystuna þegar Raul Garcia skoraði úr vítaspyrnu á 56. mínútu.

Inaki Williams steig á punktinn á 66. mínútu en klúðraði og urðu lokatölur 1-0.

Þetta reyndist fyrsti sigur Athletic í deildinni síðan 1. desember.

Villarreal er fjórum stigum frá Evrópusæti eftir tapið. Athletic er fjórum stigum eftir Villarreal.

Athletic Bilbao 1 - 0 Villarreal
1-0 Raul Garcia ('56, víti)
1-0 Inaki Williams ('66, misnotað víti)