„Þessi leikur var virkilega erfiður og Leiknismenn voru hrikalega sprækir," segir Bjarki. „Við vorum ekkert svakalega góðir í þessum leik, náðum ekki að halda vel í boltann en fórum í gegnum þetta með Þórsbaráttunni."

„Varnarmenn eru oftast bestir í því að klára færin. Ég var sennilega bara réttur maður á réttum stað," segir Bjarki um mörkin sem hann skoraði í leiknum.

Bjarki lék bæði í bakverði og miðverði gegn Leikni. Hann segir bestu stöðu sína á vellinum vera annað hvort í hægri bakverðinum eða hægra megin í hjarta varnarinnar. Hann segir að Þórsarar, sem hafa unnið báða leiki sína til þessa, ætli að vera með í baráttunni um að fara upp. „Við getum farið mjög langt og ætlum okkur að berjast um að komast upp um deild. Þrátt fyrir að hafa unnið fyrstu tvo leikina eigum við helling inni."

Bjarki er uppalinn í KA, en er nú á sínu þriðja tímabili nágrönnunum í Þór. Er það eitthvað erfitt fyrir uppalinn KA-mann að spila fyrir Þór?

„Nei, það er alls ekki erfitt. Ég myndi segja að ég væri nokkuð harður Þórsari núna. Ég held að ég sé meiri Þórsari þar sem ég er búinn að vera í Hamri á hverjum einasta degi í þrjú ár."

Bjarki er margt til lista lagt. Hann gaf lag út á dögunum sem hann segir að sé vinsælasta lagið á Akureyri. Hlusta má á lagið hérna.

„Þetta lag var nú bara upp á djókið. Þetta var samið í Covid pásunni, en það er samt skemmtilegt að þetta sé vinsælasta lagið á Akureyri." segir Bjarki.

Bestir í fyrri umferðum:
Bestur í 1. umferð: Fred Saraiva (Fram)