Erling Braut Haaland, sóknarmaður Borussia Dortmund, er sagður vera á óskalista allra af stærstu félögum Evrópu fyrir sumarið, þar á meðal Manchester City.

Guardiola var spurður út í Haaland á blaðamannafundi en sagði það vera vanvirðingu gagnvart núverandi leikmönnum sínum ef hann færi að tala um norska sóknarmanninn.

„Ég á tvo mánuði í viðbót eftir með núverandi leikmannahóp og þeir eiga skilið virðingu frá mér. Ég ætla ekki að fara að tala um aðra leikmenn þegar við eigum tvo mikilvæga mánuði eftir," sagði Guardiola og svo blótaði hann.

„Ef ég er leikmaður og þjálfarinn minn fer að tala um utanaðkomandi leikmenn þá myndi ég hugsa með mér 'hvað í fjandanum er hann að gera?'."

„Ég tala aldrei um leikmenn frá öðrum félögum, aldrei."

Sergio Aguero er á förum frá Man City í sumar og líklegt er að City sæki sér sóknarmann. Haaland og Harry Kane, sóknarmaður Tottenham, hafa verið mest í umræðunni. Guardiola segir að Man City hafi ekki efni á sóknarmanni en en hvort það sé rétt, það kemur í ljós þegar félagaskiptaglugginn opnar.