Didier Deschamps er á óskalista Real Madrid
Spænska stórveldið Real Madrid er farið að skoða þjálfaramarkaðinn fyrir sumarið en samkvæmt Fabrice Hawkins er Didier Deschamps, þjálfari franska landsliðsins, á óskalistanum.
Xabi Alonso var rekinn frá Real Madrid í byrjun árs og tók Alvaro Arbeloa við út tímabilið.
Undir stjórn Arbeloa hefur liðið tapað sex af nítján leikjum sínum á tímabilinu á meðan Alonso tapaði aðeins fimm leikjum.
Real Madrid ætlar að fá annan mann í stjórastólinn og segir Hawkins að Deschamps sé nafn sem hefur komið reglulega upp í umræðum stjórnarmanna.
Deschamps hættir með franska landsliðið eftir HM í sumar og mun Zinedine Zidane taka við stöðunni.
Áhugaverður kostur en Deschamps hefur þjálfað Frakka í fjórtán ár en þar áður var hann þjálfari Marseille, Juventus og Mónakó þar sem hann náði frábærum árangri.
Hann kom Mónakó í úrslit Meistaradeildarinnar árið 2004 og vann franska bikarinn. Deschamps hjálpaði sínu gamla félagi Juventus upp úr B-deildinni árið 2007 og þá vann hann deildina einu sinni og bikarinn þrisvar sinnum hjá Marseille.
Ekkert svo galin pæling hjá Madrídingum að sækja hann enda veit hann hvernig á að meðhöndla stórstjörnur. Fjórir Frakkar eru mála hjá Real Madrid sem hafa allir spilað undir Deschamps, en það eru þeir Kylian Mbappe, Aurelien Tchouameni, Ferland Mendy og Eduardo Camavinga.
