Fanney Inga er Evrópubikarmeistari með Thelmu og Häcken
Thelma Karen kom inn af bekknum hjá Häcken
Sænsku meistararnir í Häcken eru Evrópubikarmeistarar í fyrsta sinn í sögunni eftir samanlagðan 4-2 sigur á Hammarby á Nordic-Wellness leikvanginum í Gautaborg í dag.
Fanney Inga Birkisdóttir og Thelma Karen Pálmadóttir eru á mála hjá Häcken og spiluðu þær báða úrslitaleikina gegn Hammarby.
Þær höfðu 1-0 sigur í fyrri leiknum í Stokkhólmi í síðustu viku og kláruðu síðan dæmið í dag.
Sænski framherjinn Felicia Schröder skoraði þrennu í 3-2 sigri á Hammarby í dag, en hún er aðeins 19 ára gömul. Mögnuð frammistaða hjá þessari frábæru fótboltakonu.
Fanney var í markinu í dag og þá kom Thelma Karen inn af bekknum í hálfleik. Guðrún Arnardóttir byrjaði hjá Hammarby en fór af velli eftir aðeins fjórtán mínútur.
Þetta er í fyrsta sinn í sögunni sem Häcken er Evrópubikarmeistari og fyrsta liðið til þess að taka þann titil, en keppnin var sett á laggirnar á síðasta ári.
Häcken fær þátttökurétt í þriðju umferð í forkeppni Meistaradeildar Evrópu, en liðið hafði þegar tryggt sér farseðilinn í aðra umferð í forkeppninni eftir að hafa unnið sænsku deildina á síðasta ári.
