Eyjakonur unnu frábæran 3-2 endurkomusigur á Víkingum í 2. umferð Bestu deildar kvenna á Hásteinsvellinum í Vestmannaeyjum í dag.

Það má segja að þetta hafi verið leikur tveggja hálfleika. Víkingskonur voru með vindinn í bakið í fyrri hálfleiknum og skoruðu tvö mörk með fjögurra mínútna millibili um miðbik hálfleiksins.

Bergdís Sveinsdóttir kom gestunum yfir á 21. mínútu með marki úr vítaspyrnu eftir að Avery Mae Vanderven hafði brotið á Freyju Stefánsdóttur.

Fjórum mínútum síðar brunuðu víkingar í sókn. Emma Steinsen Jónsdóttir átti sendingu inn á markteig þar sem Jasmín Erla Ingadóttir var mætt og staðan 2-0 fyrir gestina.

Víkingar sköpuðu sér fleiri færi og voru sanngjarnt yfir í hálfleik, en í þeim síðari fengu Eyjakonur vindinn í bakið og voru þær ekki lengi að nýta sér það.

Vanderven minnkaði muninn á 50. mínútu. Sandra Voitane tók aukaspyrnu frá miðlínu á Avery sem tók vel á móti boltanum og setti hann í netið.

Mínútu síðar kom jöfnunarmarkið er Arden Joy La-Rose, markvörður ÍBV, sparkaði boltanum fram völlinn, Víkingskonur flikkuðu honum inn á Olgu Sevcova sem setti boltann niðri í hornið.

Hálftíma fyrir leikslok sá Kristín Erla Ó Johnson, leikmaður Víkings, sitt annað gula spjald og þar með rautt fyrir brot á Fridrikku Marie Clementsen.

Eyjakonur fengu urmul af færum til þess að fullkomna endurkomuna með sigurmarki og það kom fyrir rest, en það gerði Allison Patricia Clark á 83. mínútu leiksins. Viktorija Zaicikova ætlaði að þræða boltann í gegn á Allison Grace Lowrey sem náði ekki til boltans. Hann datt fyrir Clark sem reyndi skotið fyrir utan og réði Elizabeth Grace McClellan, markvörður Víkings, ekkert við skotið sem hafnaði í markinu.

Mögnuð endurkoma hjá nýliðum ÍBV sem eru með fullt hús stiga úr tveimur leikjum á meðan Víkingur er með þrjú stig.