Skóflustunga fyrir nýtt fótboltahús Hauka á 90 ára afmælinu

Lengi hefur verið beðið eftir nýju knatthúsi á Ásvöllum en 29. janúar var skrifað undir samkomulag milli Hafnarfjarðarbæjar og Hauka um byggingu knatthúss á Ásvöllum.

Fyrsta skóflustungan var svo framkvæmd á 90 ára afmælisdegi félagsins í gær en Rósa Guðbjartsdóttir, bæjarstjóri Hafnarfjarðar, tók skóflustunguna.

Ágúst Bjarni Garðarsson, formaður bæjarráðs og Kristinn Andersen, forseti bæjarstjórnar og formaður bygginganefndar um knatthúsið voru einnig á svæðinu.

Nýtt knatthús mun rísa ásamt nýju grasæfingasvæði en hér fyrir neðan má sjá nokkrar myndir af deginum.