England í dag - Chelsea og Tottenham eigast við

Þar er verið að ræða um tvö af mest spennandi liðum deildarinnar sem keyptu nýja leikmenn í sumar og verður gífurlega spennandi að fylgjast með.

Tottenham er búið að næla sér í Richarlison, Yves Bissouma, Djed Spence og Ivan Perisic á meðan Chelsea er komið með Raheem Sterling, Marc Cucurella, Kalidou Koulibaly og Carney Chukwuemeka.

Þessi lið enduðu í þriðja og fjórða sæti á síðustu leiktíð - Chelsea í þriðja og Tottenham í fjórða eftir dramatískan lokasprett þar sem öll liðin í Evrópubaráttu voru að misstíga sig furðu mikið. Lærisveinar Antonio Conte tóku framúr Arsenal og stálu Meistaradeildarsætinu.

Bæði liðin unnu í fyrstu umferð, Tottenham sannfærandi gegn Southampton á meðan Chelsea marði vængbrotið lið Everton.

Viðureign Forest og Hamranna lofar einnig góðu þar sem nýliðarnir eru þegar búnir að klófesta meira en tíu leikmenn í sumar.

Bæði lið byrjuðu tímabilið á tapi, gegn Newcastle og Man City.

Leikir dagsins:
13:00 Nott. Forest - West Ham (Síminn Sport)
15:30 Chelsea - Tottenham (Síminn Sport)