Hinn 21 árs gamli Dalot fékk lítið að spila hjá Ole Gunnar Solskjær og lánaði United hann til AC Milan fyrir þetta tímabil. Miðlar á Ítalíu greina nú frá því að AC vill kaupa leikmanninn frá United.

Dalot, sem á eftir að spila sinn fyrsta leik á Ítalíu, gæti gert það á laugardaginn kemur þegar AC og Inter Milan mætast í grannaslag í ítölsku deildinni.

Þó er enn óljóst hvort leikurinn fari fram. Sex leikmenn Inter hafa greinst með kórónuveiruna og þá er fyrrverandi liðsfélagi Dalot einn af þeim, Ashley Young.

Dalot hefur einungis spilað einn leik á þessu tímabili en sá leikur kom í sigri United á Brighton í deildabikarnum.