„Óskar sagði 'ég ætla ekki að gagnrýna mína menn, þeir eru góðir í fótbolta og við erum með karaktera.' Svarið gaf ekkert meira en það. En hver er það sem dregur þá upp úr svaðinu?" sagði Tómas Þór Þórðarson í Innkastinu í gær.

„Þetta er valid spurning. Það er engin tilviljun að Reynir Leósson er að velta þessu fyrir sér. Ef við tökum Guðjón Pétur sem dæmi. Hann hefur unnið og gert helling. Hann er algjör sigurvegari. Hann er kannski erfiður karakter en hann er fyrst og fremst frábær leikmaður og drífur menn áfram. Ég sé ekki hver er sá einstaklingur í þessu liði. Elfar Freyr, sem er einn af reynslumestu mönnunum, ætti kannski að vera í einhverju svona hlutverki. Í staðinn er hann að biðja um skiptingu í fyrri hálfleik á móti Val og staðan á honum er óljós," sagði Ingólfur Sigurðsson.

Óskar ekki í heitu sæti
Tómas Þór segir að Óskar Hrafn Þorvaldsson þurfi ekki að hafa áhyggjur af stöðu sinni sem þjálfari Breiðabliks þar sem hann sé að byggja upp nýtt lið.

„Þeir þyrftu að vera í fallsæti eftir fjórtán umferðir. Auðvitað er hann ekki að fara," sagði Tómas.

Næsti leikur Breiðabliks er gegn ÍA á heimavelli á sunnudag en þar á eftir kemur Stjarnan í heimsókn á Kópavogsvöll.

„Þeir eru í brekku og verða að vinna sig upp úr henni. Það verður mjög forvitnilegt að sjá hvernig þeir verða í næstu leikjum og hvernig þeir tækla ástandið," sagði Ingólfur Sigurðsson.

Tómas Þór Þórðarson bætti við: „Gleymum því ekki að síðan Óskar tók upp meistaraflokks skeiðklukkuna þá hefur hann varla tapað fótboltaleik. Þetta er fyrsta brekkan og fyrsta alvöru mótlætið hjá honum sem þjálfari. Þetta hefur verið svo mikil veisla hjá honum að hann var kjörinn þjálfari ársins hjá samtökum íþróttafréttamanna. Hann hefur ekki séð þetta á sínum þjálfaraferli."

Hér að neðan má hlusta á Innkastið.