Besti þjálfarinn 2020: Hann er bara algjör sigurvegari

Heimir Guðjónsson, þjálfari Íslandsmeistara Vals, er besti þjálfari Pepsi Max-deildar karla 2020. Þetta var opinberað í Innkastinu í dag en Heimir er að fá þessa nafnbót frá Fótbolta.net í þriðja sinn.

Sjá einnig:
Innkastið - Uppgjör Pepsi Max-deildarinnar

Eftir tvö ár sem þjálfari HB í Færeyjum, þar sem hann tók meistaratitilinn fyrra árið og bikarinn það seinna, mætti Heimir aftur til Íslands og tók við Valsmönnum.

Undir hans stjórn var Hlíðarendaliðið algjört yfirburðalið í sumar og vann ákaflega verðskuldaðan Íslandsmeistaratitil.

„Hann tók bara fjörið með sér frá Færeyjum og pakkaði þessu móti sama með nánast sama lið og drullaði í buxurnar fyrir ári síðan," segir Tómas Þór Þórðarson í Innkastinu.

Gunnar Birgisson benti þá á að Heimir væri kominn með sjö landsmeistaratitla á þrettán árum sem aðalþjálfari.

„Hann er bara algjör sigurvegari," segir Gunnar.