Augsburg kastaði frá sér tveggja marka forystu og klúðraði vítaspyrnu í 2-2 jafntefli gegn Hoffenheim í þýsku deildinni í kvöld.

Heimamenn í Augsburg gátu ekki beðið um betri byrjun en þeir komust í 2-0 forystu á þriggja mínútna kafla.

Alexis Claude-Maurice skoraði frábært mark á 11. mínútu er hann fékk boltann fyrir utan teig, keyrði hægra megin og skaut boltanum síðan í fjærhornið áður en Michael Gregoritsch bætti við öðru er misskilningur varð á milli varnarmanna Hoffenheim sem leyfði Gregoritsch að taka á móti háum bolta áður en hann skaut honum neðst í hægra hornið.

Ekki byrjunin sem Hoffenheim var að búast við en þeir tóku sér tak og náðu að jafna á sjö mínútum undir lok fyrri hálfleiks. Robin Hranac minnkaði muninn með flugskalla eftir hornspyrnu og síðan jafnaði Bazoumana Toure, skotmark Liverpool, metin úr ómögulegu færi.

Hann fékk boltann vinstra megin í teignum, alveg upp við endalínu, en ákvað bara að láta vaða og fór boltinn í stöngina á fjær og í netið.

Það var ekki sama markaflóðið í þeim síðari en Augsburg fékk tækifæri til þess að taka öll stigin undir lok leiks er Bernardo braut af sér í teignum. Claude-Maurice fór á punktinn en setti boltann yfir markið.

Léttir fyrir Hoffenheim sem er þó svekkt að hafa ekki getað náð í fleiri stig í Meistaradeildarbaráttunni. Hoffenheim er í 5. sæti með 51 stig, tveimur stigum frá Meistaradeildarsæti en Augsburg í 10. sæti með 33 stig.