Sigríður Lára Garðarsdóttir í leik með ÍBV fyrir nokkrum árum síðan.
Fyrrum landsliðskonan Sigríður Lára Garðarsdóttir er búin að fá félagaskipti yfir í ÍBV.
Hún fær leikheimild með liðinu á morgun og getur því spilað með ÍBV seinni hluta tímabilsins.
Hún fær leikheimild með liðinu á morgun og getur því spilað með ÍBV seinni hluta tímabilsins.
Sísí Lára, eins og hún er yfirleitt kölluð, er uppalin í ÍBV og spilaði sinn fyrsta deildarleik með liðinu aðeins 15 ára gömul. Síðan þá hefur hún spilað 167 leiki í efstu deild með ÍBV, Val og FH og skorað 24 mörk.
Sísí á Íslandsmeistaratitil, bikarmeistaratitla og stórmót með landsliðinu á ferilskrá sinni. Á síðasta tímabili hjálpaði hún FH að komast aftur upp í efstu deild þar sem hún lék 18 leiki og gerði eitt mark.
Hún ákvað að leggja skóna á hilluna eftir síðasta tímabil. Hún hefur síðustu árin glímt við liðagigt og það hefur tekið á að vera á fullu í fótbolta með því.
Samkvæmt heimildum Fótbolta.net er ekki öruggt að Sísí Lára spili með ÍBV en þessi félagaskipti gefa þann möguleika ef eitthvað kemur upp hjá félaginu, ef það vantar í liðið þá er hún til staðar.
ÍBV er í harðri fallbaráttu en liðið náði í mikilvægt stig gegn Þrótti í Laugardalnum í síðustu viku.
Athugasemdir
