„Spilað frábærlega með Fredrikstad sem er að koma öllum á óvart í Noregi"

Júlíus Magnússon hefur farið frábærlega af stað í norsku úrvalsdeildinni með liði sínu Fredrikstad. Fredrikstad er nýliði í deildinni og er Júlíus í lykilhlutverki í liðinu. Hann hefur vakið athygli með spilamennsku sinni, skorað bæði í deildinni og í bikarnum og var í liði vikunnar fyrir frammistöðuna gegn Lilleström um helgina..

Júlíus er 25 ára varnarsinnaður miðjumaður sem norska félagið keypti af Víkingi fyrir tímabilið í fyrra. Hann var fljótur að vinna sig inn í byrjunarliðið og var kominn með fyrirliðabandið í lok tímabilsins. Fredrikstad flaug upp úr B-deildinni og hefur, eins og fyrr segir, byrjað tímabilið í efstu deild virkilega vel. Júlíus hefur spilað allar mínúturnar í deildinni til þessa og situr Fredrikstad í 2. sæti deildarinnar sem stendur.

Júlíus var valinn í landsliðshópinn síðasta haust en hefur ekki verið valinn síðan. Landsliðsþjálfarinn Age Hareide var spurður út í Júlíu á fréttamannafundi í dag.