FIFA hefur ákveðið að sekta mexíkóska knattspyrnusambandið um 109 þúsund dollara, eða 13,6 milljónir íslenskra króna, vegna hegðunar stuðningsmanna landsliðsins á æfingaleik gegn Íslandi í lok maí.
Söngvar sem beinast gegn samkynhneigðum heyrðust úr stúku Mexíkóa en þetta er alls ekki í fyrsta sinn sem knattspyrnusambandið þar í landi er beitt sektum vegna hegðunar stuðningsmanna landsliðsins.
Mexíkó hefur þurft að spila leiki fyrir luktum dyrum vegna hegðunar stuðningsmanna sem virðast einfaldlega ekki geta hætt að syngja á niðrandi hátt um samkynhneigt fólk.
Í heildina hefur mexíkóska knattspyrnusambandið þurft að borga 336 þúsund dollara í sektir vegna þessa níðsöngva í 16 sektum.
Níðsöngvum Mexíkóa var ítrekað beitt að Rúnari Alex Rúnarssyni eftir að hann tók markspyrnur. Dómarinn stöðvaði leikinn í skamma stund en það hjálpaði ekki.
Leikurinn var þó kláraður og urðu lokatölur 2-1 fyrir Mexíkó.
Athugasemdir