Í yfirlýsingu frá félaginu segir:

,,Markmið félagsins er að stuðla að framgangi og enn frekari uppbyggingu knattspyrnuíþróttarinnar innan Víkings með það sem meginviðfangsefni að gefa ungum knattspyrnumönnum sem aldir hafa verið upp hjá félaginu möguleika á að iðka íþróttina áfram innan vébanda félagsins enda þótt þeir nái ekki að festa rætur innan meistaraflokks Víkings strax eftir að þátttöku í 2. flokki lýkur."

Nafnið Berserkir er sama nafn og stuðningsmannahópur Víkinga ber en sá hópur hefur verið gríðarlega öflugur í stúkunni undanfarin ár óháð hvaða deild liðið hefur leikið í.

Liðið bíður nú eftir að fá keppnisleyfi frá Íþróttasambandi Íslands og í kjölfar þess munu þeir verða skráðir til leiks í 3. deild. Liðið mun að öllum líkindum leika heimaleiki sína á aðalvellinum í Víkinni og mun leika í Berserkjabúningunum sem eru svartir og rauð röndóttir eins og aðalbúningar Víkinga.

Slík tenglafélög eru þekkt annars staðar hér á landi og má þannig nefna HK og Ýmir í Kópavogi, ÍBV og KFS í Vestmannaeyjum og fleiri.

Stjórn Kf. Berserkir skipa eftirtaldir einstaklingar:

Formaður:
Tómas Þór Þórðarson

Meðstjórnendur:
Einar Guðnason
Einar Ásgeir Einarsson
Sigurhjörtur Snorrason
Gunnlaugur A. Júlíusson