Nikolaj Hansen kom Víkingum yfir eftir aðeins þriggja mínútna leik. Heimamenn voru hins vegar ekki lengi yfir. Á tíu mínútna kafla um miðbik fyrri hálfleiks tókst Stjörnunni að skora þrjú mörk og var staðan allt í einu orðin 1-3.

Kristall Máni Ingason minnkaði muninn fyrir Víkinga og hefðu þeir hæglega getað jafnað metin fyrir leikhlé. Davíð Örn Atlason átti klúður tímabilsins þegar hann skaut yfir markið úr dauðafæri.

Stjörnumenn lögðust ekki í skotgrafirnar í seinni hálfleik. Þeir héldu áfram að spila sinn leik og þeir voru hugrakkir. Það skilaði sér í marki, mörkum. Eggert Aron Guðmundsson kom þeim í 2-4 áður en Kristall Máni minnkaði muninn aftur af vítapunktinum. Stjörnumenn héldu áfram eftir það og aftur skoruðu þeir; Emil Atlason fullkomnaði þá þrennu sína.

Kristall fullkomnaði þrennu sína þegar tíu mínútur voru eftir af venjulegum leiktíma en Víkingar komust ekki lengra eftir það, og lokatölur 4-5 í þessum ótrúlega fótboltaleik.

Stjarnan er með sjö stig eftir þrjá leiki en það er áhyggjuefni fyrir Íslands- og bikarmeistarana að þeir séu bara með þrjú stig og búnir að fá á sig níu mörk strax.

Fyrsta stig Framara
Það var aðeins minna fjör í Safamýri þar sem nýliðar Fram fengu Skagamenn í heimsókn. Tvö gömul stórveldi að mætast.

Svo fór að liðin skildu jöfn. Guðmundur Magnússon kom Fram yfir um miðjan fyrri hálfleik en rétt fyrir leikhlé jafnaði Eyþór Aron Wöhler metin.

Seinni hálfleikurinn var ekki mikið fyrir augað og niðurstaðan jafntefli. ÍA er með fimm stig og hefur ekki enn tapað leik, en Fram er með eitt stig núna.

Víkingur R. 4 - 5 Stjarnan
1-0 Nikolaj Andreas Hansen ('3 )
1-1 Emil Atlason ('19 )
1-2 Adolf Daði Birgisson ('27 )
1-3 Emil Atlason ('29 )
2-3 Kristall Máni Ingason ('33 )
2-4 Eggert Aron Guðmundsson ('64 )
3-4 Kristall Máni Ingason ('68 , víti)
3-5 Emil Atlason ('74 )
4-5 Kristall Máni Ingason ('80 )
Lestu um leikinn

Fram 1 - 1 ÍA
1-0 Guðmundur Magnússon ('22 )
1-1 Eyþór Aron Wöhler ('42 )
Lestu um leikinn