Serhiy Palkin, framkvæmdastjóri úkraínska stórveldisins Shakhtar Donetsk, býst við að ísraelski kantmaðurinn Manor Solomon gangi til liðs við Tottenham í sumar.
Solomon á hálft ár eftir af samningi sínum við Shakhtar og segir Palkin að úkraínska félagið sé reiðubúið til að fara í mál við Tottenham.
„Ég trúi því að Manor Solomon verði áfram á Englandi. Ef hann fer til Tottenham þá munum við fara í mál við félagið," sagði Palkin við ESPN. „Þið getið ímyndað ykkur. Við borgum mikinn pening fyrir leikmann og á endanum fær Tottenham hann á frjálsri sölu? Það þykir okkur ekki vera sanngjarnt."
Solomon er 23 ára gamall og hefur sýnt flotta takta með Fulham á enska úrvalsdeildartímabilinu. Leikmaðurinn valdi sjálfur að yfirgefa Shakhtar vegna stríðsástandsins sem ríkir í Úkraínu.
Shakhtar borgaði um 6 milljónir evra til að kaupa Solomon frá Maccabi Petah Tikva í janúar 2019.
