Senegalski kantmaðurinn Ismaila Sarr var í sviðsljósinu í 1-1 jafntefli Watford gegn WBA í ensku B-deildinni á The Hawthorns-leikvanginum í kvöld.

Sarr skoraði draumamark á 12. mínútu. Hann fékk boltann við miðjuna, horfði upp og sá að David Button, markvörður WBA, stóð alltof framarlega og nýtti sér það með að þruma boltanum yfir hann og í netið.

Karlan Grant jafnaði metin fyrir WBA undir lok fyrri hálfleiks en Sarr fékk tækifæri á að koma Watford yfir á 73. mínútu. Sarr lét vaða á markið en Button varði og bætti upp fyrir mistök sín fyrr í leiknum.

Lokatölur 1-1 á Hawthorns. Watford er með 4 stig eftir fyrstu tvo leikina en WBA er með 2 stig.