Fernandes og Garnacho trúðu ekki sínum eigin augum þegar Kavanagh reif upp rauða spjaldið.
Howard Webb, yfirmaður dómaramála í enska boltanum, viðurkennir að það hafi verið mistök hjá VAR-teyminu að snúa ekki ákvörðun Chris Kavanagh við þegar hann gaf Bruno Fernandes beint rautt spjald í 0-3 tapi Manchester United gegn Tottenham í lok september.
Fernandes fór sjálfkrafa í þriggja leikja bann en það var fellt niður eftir áfrýjun frá Man Utd og þess vegna gat hann spilað í markalausu jafntefli gegn Aston Villa um helgina.
„Þetta eru mistök. Í þessu tilfelli átti VAR að senda dómarann að skjánum, þar sem hann hefði átt að snúa ákvörðun sinni við," sagði Webb, sem var svo spurður út í fleiri vafaatriði sem hafa átt sér stað í enska boltanum nýlega en var sáttur með allar aðrar stórar ákvarðanir hjá dómurunum sínum.
Það er deilt gríðarlega mikið um dómgæslu í enska boltanum og útskýrir Webb reglulega helstu ákvarðanir dómara ensku úrvalsdeildarinnar fyrir almenningi.
Athugasemdir
