Kambwala mun reyna fyrir sér í spænska boltanum á næstu leiktíð.
Varnarmaðurinn efnilegi Willy Kambwala er búinn að standast læknisskoðun hjá spænska félaginu Villarreal og verður tilkynntur sem nýr leikmaður á næstu dögum.
Villarreal borgar 10 milljónir evra til að kaupa hinn 19 ára gamla Kambwala frá Manchester United, en Rauðu djöflarnir eru með endurkaupsrétt á leikmanninum og fá háa prósentu af næstu sölu leikmannsins frá Villarreal.
Fótboltafréttamaðurinn Fabrizio Romano greinir frá þessu, en Kambwala spilaði sinn fyrsta leik fyrir Man Utd í september í fyrra og spilaði 10 leiki yfir tímabilið, þar sem mikil meiðslavandræði hrjáðu varnarlínu Rauðu djöflanna.
Kambwala á aðeins eitt ár eftir af samningi sínum við Man Utd og vill fá meiri spiltíma en er í boði á Old Trafford.
Kambwala er franskur og hefur verið kallaður upp í U16 og U20 landsliðin, en ekki fengið að spreyta sig í keppnisleik.
Athugasemdir
