AC Milan og Newcastle United gerðu markalaust jafntefli í fyrstu umferð í F-riðli riðlakeppni Meistaradeildar Evrópu í kvöld, en leikurinn fór fram á San Síró.
Þetta var fyrsti Meistaradeildarleikur Newcastle í 20 ár og kom liðið ágætlega frá sínu þó Milan hafi fengið fullt af tækifærum.
Leikurinn var meira og minna einstefna af hálfu Milan. Nick Pope, markvörður Newcastle, varði sex góð færi Milan í fyrri hálfleiknum, það fyrsta frá Tommaso Pobega áður en Samuel Chukwueze átti skalla beint á enska markvörðinn.
Stuttu síðar varði hann frá franska framherjanum Olivier Giroud eftir smá vandræðagang í teignum.
Í síðari hálfleik fékk Rafael Leao góðan séns í teignum eftir fyrirgjöf Alessandro Florenzi en skalli hans fór yfir.
Newcastle fékk tækifæri til að stela sigrinum í lokin er Elliot Anderson fann Sean Longstaff í teignum en varamarkvörðurinn Marco Sportiello átti stórkostlega vörslu og bjargaði heimamönnum.
Lokatölur 0-0 í Mílanó. Pope maður leiksins og geta gestirnir svo sannarlega fagnað þessum úrslitum.
RB Leipzig lagði þá Young Boys að velli, 3-1, í G-riðlinum. Mohamed Simakan stangaði hornspyrnu David Raum í netið á 3. mínútu áður en Meschack Elia jafnaði fyrir heimamenn með laglegu skoti hálftíma síðar.
Leipzig kláraði dæmið í síðari. Xaver Schlager skoraði af 30 metra færi eftir hornspyrnu þegar tuttugu mínútur voru eftir. Schlager fékk full mikinn tíma á boltann áður en hann setti boltann í netið áður en Benjamin Sesko gerði þriðja og síðasta mark Leipzig í uppbótartíma.
Úrslit og markaskorarar:
F-riðill
Milan 0 - 0 Newcastle
G-riðill
Young Boys 1 - 3 RB Leipzig
0-1 Mohamed Simakan ('3 )
1-1 Elia Meschack ('33 )
1-2 Xaver Schlager ('73 )
1-3 Benjamin Sesko ('90 )
Athugasemdir
