Heimild: Vísir.is
Sigurvin Ólafsson, þjálfari KV og aðstoðarmaður Rúnars Kristinssonar hjá KR, hættir á næstu dögum og tekur við sem aðstoðarþjálfari FH en þetta kemur fram á Vísi.
Eiður Smári Guðjohnsen gerði í gær tveggja ára samning við FH og tekur við keflinu af Ólafi Jóhannessyni sem var látinn fara á fimmtudag eftir 2-2 jafntefli liðsins gegn Leikni í Bestu deildinni.
Hann stýrði sinni fyrstu æfingu í gær en Davíð Þór Viðarsson, yfirmaður fótboltamála hjá FH, var honum innan handar á æfingunni.
Eiður er búinn að finna aðstoðarmann en Vísir segir frá því að Sigurvin Ólafsson verði næsti aðstoðarþjálfari FH. Kristján Óli SIgurðsson í Þungavigtinni fullyrðir það sama á Twitter og segir ákvörðunina skiljanlega, enda sé hann fjórði aðstoðarmaður Rúnars á bekk KR-inga.
Venni yfirgefur KR enda orðinn þjálfari nr. 4 þar á eftir Rúnari, Bjarna Guðjóns og Viktori Bjarka.
— Kristján Óli Sigurðsson (@kristjanoli) June 19, 2022
Mjög skiljanleg ákvörðun.
Sigurvin þekkir vel til hjá FH en hann spilaði tvö tímabil með liðinu 2006-2007 og lék þar 30 leiki ásamt því að skora 4 mörk. Hann varð bæði Íslands- og bikarmeistari með félaginu.
Athugasemdir