Paolo spilaði með Milan allan sinn feril en hann lék með liðinu frá 1984 til 2009. Hann lék þá 126 landsleiki og skoraði 7 mörk fyrir ítalska landsliðið og vann allt sem hægt er að vinna með félagsliði og landsliði.

Hann er í dag framkvæmdastjóri Milan og þá spilar Daniel, sonur hans, með liðinu. Þeir voru greindir með kórónaveiruna í gær en Paolo segir að þeir komi til með að jafna sig á viku.

„Ég vil þakka öllum sem sendu hlý skilaboð og höfðu áhyggjur af syni mínum og heilsu hans. Okkur líður vel og við ættum að geta losað okkur við veiruna á viku. Takk fyrir hlýjuna. Ég vil líka þakka öllum læknunum, hjúkrunarfræðingunum og öllum þeim sem vinna í þessu ástandi fyrir fagmennsku og hugrekki. Enn og aftur finnur maður stolt í hjarta að vera ítalskur," sagði Paolo.