Murat Yakin gerir tvær breytingar á svissneska byrjunarliðinu sem gerði jafntefli við Skotland í síðustu umferð. Þar koma Breel Embolo og Fabian Rieder inn í liðið fyrir Ruben Vargas og Xherdan Shaqiri.

Julian Nagelsmann breytir hins vegar engu við þýska byrjunarliðið sem er búið að vinna fyrstu tvo leiki sína nokkuð þægilega. Þar eru það Florian Wirtz, Jamal Musiala og Kai Havertz sem leiða sóknarlínuna.

Sviss þarf sigur til að stela toppsæti riðilsins af Þjóðverjum en þeir eru nokkuð öruggir með annað sætið sem stendur, þó að þeir tapi þessum leik hér í kvöld.

Sviss: Sommer, Akanji, Schar, Rodriguez, Widmer, Freuler, Xhaka, Rieder, Aebishcer, Ndoye, Embolo

Þýskaland: Neuer, Kimmich, Tah, Rudiger, Mittelstadt, Kroos, Gundogan, Andrich, Musiala, Wirtz, Havertz

Skotar og Ungverjar eru að berjast um þriðja sætið sem gæti komið öðru hvoru liðinu upp úr riðlakeppninni. Ljóst er að jafntefli mun ekki gera mikið fyrir þessi lið hér í dag og því verður spilað til sigurs.

Steve Clarke gerir eina breytingu á skoska liðinu sem náði jafntefli gegn Sviss í síðustu umferð, þar sem Scott McKenna, leikmaður FCK, kemur inn í byrjunarliðið fyrir meiddan Kieran Tierney.

Ungverjar gera tvær breytingar frá tapinu gegn Þjóðverjum, þar sem Endre Botka kemur inn í varnarlínuna fyrir Attila Fiola og Callum Styles fær tækifæri á miðjunni í staðinn fyrir Adam Nagy.

Styles er uppalinn á Englandi og leikur með Sunderland í Championship deildinni. Hann er að spila sinn fyrsta leik á stórmóti í kvöld.

Skotland: Gunn, Ralston, Hendry, Hanley, McKenna, Robertson, McGinn, Gilmour, McGregor, McTominay, Adams

Ungverjaland: Gulacsi, Botka, Orban, Dardai, Bolla, Styles, Schafer, Kerkez, Sallai, Szoboszlai, Varga