Guardiola: United var ekki betra liðið í dag

Pep var augljóslega fúll eftir tapið og gaf mjög stutt svör til fréttamanns BBC.

„Ég óskaði strákunum bara til hamingju með frábært tímabil," svaraði Pep þegar hann var spurður út í hvað hann hafi sagt við leikmenn eftir tapið.

„Við töpuðum þessum leik og ég óska United til hamingju með sigurinn. Þetta var jafn leikur en svona getur gerst í fótboltanum. Þeir skoruðu tvö mörk og við gátum ekki skorað meira en eitt."

Fyrir upphafsflautið talaði Pep um möguleikann að tapa viðureigninni. Hann sagði að það væri allt í lagi svo lengi sem hans menn myndu spila sinn leikstíl og tapa gegn sterkara liði. Var það tilfellið í dag?

„Nei," svaraði Pep og var svo spurður hvort hann teldi United ekki hafa verið sterkari aðilann í dag. „Nei.

„Við lentum í smá erfiðleikum í fyrri hálfleik en við stjórnuðum seinni hálfleiknum gjörsamlega frá fyrstu til síðustu mínútu. Við vorum óheppnir að skora ekki meira. Yfir heildina litið var þetta flott frammistaða hjá okkur í úrslitaleik."