„Liðið sem tapar má hafa risastórar áhyggjur“

Fjórða umferð Bestu deildarinnar fer af stað í dag og meðal leikja er viðureign KA og FH á Akureyri sem hefst 16:15. Liðin eru á botninum með eitt stig hvort.

„Liðið sem tapar þessum leik má hafa risastórar áhyggjur," segir Elvar Geir Magnússon í útvarpsþættinum Fótbolti.net þar sem hitað var upp fyrir umferðina.

„Eigum við ekki að segja að þetta séu tvö lélegustu liðin það sem af er móti, er það nokkuð ósanngjarnt?" segir Tómas Þór Þórðarson en honum líst sérstaklega illa á KA liðið.

„Mér finnst samt tvö til þrjú þrep á milli. Ég hef stórkostlegar áhyggjur af Knattspyrnufélagi Akureyrar. Menn hafa talað um að þeir sjái KA ekki falla út af þessum leikmannahóp, hafa þeir séð þá spila? Hafa þeir séð þá verjast?"

„Mér finnst FH töluvert betra en KA en varnarvandræðin eru enn til staðar hjá FH. Ég ætla að leyfa mér að setja spurningamerki við Mathias Rosenörn í markinu, mér finnst hann ekkert geta."