Zenit frá Sankti Pétursborg og Spartak Moskva mættust í rússneska bikarnum í dag og úr varð markalaust jafntefli sem endaði með heiftarlegum slagsmálum fyrir vítaspyrnukeppnina.
Leikurinn var flautaður af í stöðunni 0-0 og menn voru að undirbúa sig andlega fyrir vítaspyrnukeppni þegar allt fór á flug. Tveir leikmenn úr sitthvoru liði tóku að rífast nokkuð heiftarlega en ástandið var ótrúlega fljótt að versna og allt í einu orðið að hópslagsmálum.
Menn voru ekkert að spara höggin þar sem hnefar og takkar flugu manna á milli og verður eflaust nokkuð um meiðsli eftir þessa vitleysu.
Hasarinn má sjá hér fyrir neðan en lesendur eru varaðir við því mikla ofbeldi sem birtist í myndbandinu. Sex rauð spjöld fóru á loft eftir átökin, þrjú hjá hvoru liði.
